AUE TV
    1. AUE TV

    Era Val d’Aran acuelherà, d’ara endeuant, es Pròves d’Accès ara Universitat

    03/03/2022

    Eth Conselh Generau d’Aran e eth departament de Recerca e Universitats dera Generalitat de Catalunya an signat aguest maitin un convèni damb era UdL entà qu’er estudiantat d’Aran e era Alta Ribagorça realize es Pròves d’Accès ara Universitat (PAU) en Vielha

    Era sindica d’Aran, Maria Vergés, e era conselhèra de Coneishement, Angelina Cases, an recebut aguest maitin ena sedença deth Conselh Generau d’Aran ara conselhèra de Recèrca e Universitats dera Generalitat, Gemma Geis e era secretària deth Conselh Interuniversitari de Catalunya (CIC), Cristina Gelpí, damb qui an mantengut ua amassada de trabalh abans de signar eth convèni entre eth Conselh Generau d’Aran, eth departament de Recèrca e Univesitats e era Universitat de Lleida (UdL) entà qu’er estudiantat d’Aran e era Alta Ribagorça realize es Pròves d’Accès ara Universitat (PAU) en Vielha.


    “Entath govèrn deth Conselh Generau d’Aran, aguest acòrd ei un auanç fòrça important, pr’amor qu’artenhem qu’es estudiants deth nòste territòri e dera Alta Ribagòrça s’estauvien eth besonh de desplaçar-se lèu 200 km d’anada e 200 mès de tornada per ua carretèra de montanha enquia Lhèida, coma ac auien de hèr abans dera pandèmia, un desplaçament e ua estada que, ath delà, supausauen ua despena economica importanta entàs familhes”, explicaue era sindica d’Aran, en tot híger que: “aguest ei un pas mès entà equiparar ara joenessa dera Val d’Aran ara que viu en granes ciutats, en tot aufrir-les ua falicitat e un dret que meriten e que les facilitarà era realizacion d’aguestes pròves”.

    Per miei d’aguest convèni, es tres parts se comprometen a aportar es mieis economics, tecnics e personaus de besonh entà qu’aguestes pròves poguen desvolopar-se en nòste territòri damb totes es garanties, en tot assumir eth Conselh Generau d’Aran eth subercòst que genère era incorporacion d’un tribunau des PAU en Vielha. Per tant, es pròves d’accès ara universitat de 2022 e enquia que se mantengue en vigéncia er acòrd (quate ans prorrogables) se realizaràn en Aran.


    Era conselhèra Geis a mostrat era sua: “satisfaccion pera signatura d’aguest convèni que respon ar objectiu deth departament de Recerca e Universitats de vertebrar eth país a trauès deth coneishement, e açò vò díder qu’an de neisher oportunitats e que cau reconéisher era diversitat de Catalunya e reconéisher era singularitat dera Val d’Aran”.


    Per part sua, era conselhèra Cases a declarat que “deth Conselh Generau d’Aran ençà èm plan satisfets que aguesta iniciativa, prepausada pes pròpis alumnes der Institut d’Aran ath Plen deth Conselh Generau d’Aran ara hè dus ans” e higie que: “deth govèrn d’Aran ençà auem persutat aguesti ans entà arténher era realizacion des PAU en nòste territòri, dejà ac artenherem coma mesura extraodinària pera pandèmia, mès damb aguest convèni s’assolide aguest dret fonamentau entàs nòsti estudiants”.


    HÒNT: CONSELH GENERAU D'ARAN 
    Manu Moga
    Tornar