Era fibra optica arribe en Gessa, Unha, Salardú e Arties

Des d'aguest mes de junh, es trabalhs realizadi per Telefónica permeten ara poblacion, as enterpreses e as institucions d'aguestes zònes disposar de connexion auançada. Açò supause un gran auanç pr’amor que fòrça residents la sollicitauen des de hège fòrça temps e, damb er aument deth teletrabalh, s'auie convertit en un des requisits essenciaus entre era poblacion.

Eth baile de Naut Aran, César Ruiz-Canela, destaque qu'era arribada dera fibra optica ath municipi "supausarà ua grana innovacion entà toti es vesins e enterpreses deth nòste territòri pr'amor que mos place clarament en sègle XXI a nivèu tecnologic”.

Ath delà, ahig que “i a fòrça gent que s'a desplaçat entà Naut Aran pendent aguesti mesi de pandemia entà teletrebalhar e açò ajudarà en grana manèra ath hèt que poguen desvolopar sense cap sòrta d'obstacle es sòns projèctes a distància”.

Pera sua part, eth director de Grani Compdes e Administracions Publiques de Telefónica en Catalonha, Jordi Giné, a explicat que “era fibra optica ei ua tecnologia qu'exigís ua importanta inversion, mès, en Telefónica, auem era conviccion qu'ei era milhor apòsta que podem hèr, perqué aué dia, era digitalizacion ei cada viatge mès essenciau”.

Rebrembam qu'es vesins dera poblacion de Garòs ja gaudissen dera fibra optica des deth mes de deseme passat. Era prevision dera companhia ei poder extier aguesta tecnologia ara rèsta de nuclèus deth municipi çò de mès de rapid possible. En aguest sens,sonque demorarà entà aufrir-la en Bagergue, Tredòs e Baqueira.

HÒNT: AJUNTAMENT DE NAUT ARAN