Era Escòla mairau "Era Cunhèra" daurís deman es inscripcions

Deman, diuendres 1 de març, comence eth periòde d’inscripcions dera escòla mairau “Era Cunhèra” de Vielha entath cors 2019/20, periòde que s'esten enquiath pròplèu 31 de mai.

Entath nau cors escolar i aurà un totau de 68 places que seràn corbides pes alumnes dera següenta manèra: en P0 i aurà un totau de 8 places de naua inscripcion, en P1 i aurà 26 places (8 d’aqueres seràn corbides automaticament pes alumnes qu'enguan corsen P0, per tant i aurà 18 places naues) e en P2 i aurà un totau de 34 places (24 des quaus seràn aucupades pes alumnes qu'enguan corsen P1, de manèra que i aurà sonque 10 places de naua inscripcion).

“Era escòla mairau “Era Cunhèra” de Vielha ei ua des installacions municipaus mès importantes qu'auem e pendent er actuau cors escolar a eth 100% des places aucupades per alumnes”, explique era còsso d'Ensenhament, Maria Vergés, que hig que “tot e qu’era Generalitat eliminèc en 2014 es ajudes que balhaue as ajuntaments tàs escòles mairaus, ajuda qu’ara balhe era Deputacion, tot e que redusida ara mitat. Auem hèt un gran esfòrç entà qu’eth servici, tot e non èster obligatòri, se pogue mantier damb era qualitat de besonh”.

Atau madeish, Vergés a arregraït “eth trabalh de tot eth personau dera Escòla que hè possible que se seguisque desvolopant un servici basic tath nòste municipi”. 

Un còp finalizat eth periòde d'inscripcion, er 11 de junh se publicarà era lista damb era puntuacion provisionau. Deth 12 ath 14 de junh se daurirà un periòde entà presentar quinsevolh tipe de reclamacion. Eth 17 de junh se publicarà era lista de sollicituds damb era puntuacion definitiva des alumnes admetudi e, s'ei de besonh, dera lista de demora. Eth 18 de junh se celebrarie eth tiratge entà ordenar es sollicituds en cas d'empat ena Sala de Plens der Ajuntament de Vielha e Mijaran e, fin finau, deth 19 ath 28 de junh se daurirà eth periòde de matriculacion.

IMATGE: AJUNTAMENT DE VIELHA E MIJARAN