Era EMD de Bagergue reedite eth calendari solidari entà ajudar as persones afectades pera DANA en Valéncia

Eth calendari a estat dessenhat coma ua òbra colaborativa, damb era implicacion de vesins deth pòble, qu’an trabalhat amassa entà recopilar e seleccionar fotografies antigues que mòstren era istòria e era vida quotidiana de Bagergue. Cada mes deth calendari includís imatges representatives deth passat deth pòble, acompanhades per arrepervèris tradicionaus en aranés, qu’apòrten un tòc unic e especiau.

Aguest projècte cerque rememoriar es arraïtzes culturaus deth pòble e hèr un aumenatge a totes aqueres persones que contribuïren a hèr de Bagergue çò qu’ei aué. Ath madeish temps, vò transméter era importància de conéisher era nòsta istòria entà poder víuer eth present damb mès consciéncia e adaptar-mos ath futur. Ei, donques, un projècte qu’amasse passat, present e futur, damb un objectiu solidari.

Deuant er èxit d’aguesta iniciatiua, era EMD de Bagergue a decidit reeditar eth calendari entà que totes aqueres persones interessades poguen aquerí’c e collaborar damb es victimes dera DANA en Valéncia. Eth calendari, que se presente en format de supòrt de taula, ei ua òbra que met en valor era riquesa culturau de Bagergue e a un valor ahijud, pera sua vinculacion damb era solidaritat.

Eth prètz deth calendari ei de 5 èuros, e tota era recaptacion se destinarà integralaments a ajudar as persones afectades pera DANA en Valéncia. Es exemplars se pòden aquerir en tot contactar damb es hilats sociaus de Bagergue, o en tot enviar un corrèu electronic a [email protected].

Damb aguesta iniciatiua, Bagergue reafirme eth sòn compromís damb era solidaritat, era preservacion dera cultura e era memòria collectiva deth pòble, en tot demostrar ua grana capacitat d’adaptacion e compromís damb eth futur.


HÒNT: EMD BAGERGUE