Era delegada deth Govèrn en Alt Pirineu e Aran, Sílvia Romero, visite Bagergue entà abordar era melhora deth tractament d'aigües residuaus
Era delegada deth Govèrn en Alt Pirineu e Aran, Sílvia Romero, a visitat recentaments era poblacion de Bagergue entà amassar-se damb eth baile dera EMD de Bagergue, Marc Tarrau Leja; Francisco Bruna, conselhèr deth Departament de Territòri, Païsatge e Cambiament Climatic deth Conselh Generau d’Aran; e tecnicians deth Conselh Generau d’Aran, damb er objectiu de cercar solucions entà melhorar eth tractament des aigües residuaus ena zòna e aleugerir es empediments administratius qu’an empedit auançar en aguesta òbra essenciau
Actuauments, Bagergue non dispòse d’un sistèma avient de tractament d’aigües residuaus, çò que genère preocupacion tant pera qualitat de vida des sòns vesins coma pera preservacion deth miei ambient. En aguesta amassada s’a insistit en besonh urgent de bastir un colector que connècte Bagergue damb Unha, en tot contunhar entà Salardú e ara fin connectar damb era depuradora de Naut Aran, plaçada en Garòs. Aguesta infrastructura non sonque garantirà un corrècte tractament des aigües residuaus, mès tanben permeterà complir damb era nòrma mieiambientau en vigor e evitar possibles sancions futures.
Sílvia Romero a destacat era importància d’aguesta iniciatiua e a soslinhat eth compromís deth Govern entà agilizar es tramits administratius de besonh entà començar aguest projècte. Era implementación d’aguesta solucion non pòt contunhar demorant, donques qu’era fauta d’un sistèma avient de sanejament mèt en risc eth desvolopament sostenible deth municipi e era sua capacitat de absorbir er increment de poblacion e torisme.
Marc Tarrau a soslinhat qu’«abordar aguest problèma ei cruciau entath desvolopament deth nòste pòble. Non podem compréner qu’en plen 2025 Bagergue encara non dispòse d’un sistèma de tractament d’aigües residuaus avient. Èm un pòble qu’apòste peth desvolopament sostenible e peth suenh deth nòste entorn naturau, e aguest projècte ei essenciau entà garantir un futur respetuós damb eth miei ambient e damb era qualitat de vida des nòsti vesins”.
Actuauments, Bagergue ei era unica poblacion deth municipi de Naut Aran que non dispòse d’un tractament avient d’aigües residuaus.
Aguestes aigües son tractades unicaments damb ua rèisha, un sistèma insufisent, especiuaments en un contèxt de creishement urbanistic significatiu que viuem coma eth qu’èm viuent. Credem imprescindible connectar es aigües residuaus de Bagergue damb era Depuradora Generau de Naut Aran, plaçada en Garòs. Era nòsta EMD a un fòrt compromís damb era sostenibilitat e eth suenh deth miei ambient, per çò que consideram prioritari implementar mesures qu’asseguren ua gestion responsabla des aigües residuaus e que garantisquen un desvolopament armonic e sostenible deth nòste pòble.
Eth Govèrn se comprometut a trabalhar amassa damb es administracions locaus entà trobar vies de finançament e garantir qu’aguest projècte se pogue executar çò abantes possible.
HÒNT: EMD BAGERGUE
