Era Corsa des 15 pòbles presente diuèrses nauetats damb era arribada d'Èm Aran Sports Foundation

Pendent aguest fin de setmana se desvoloparà ena Val d’Aran era 27au Corsa e Caminada des 15 pòbles. Aguesta pròva ei era mès antiga de totes es corses de montanha que i a actuauments en territòri e enguan presente ua nauetat tanplan importanta.

Era corsa a estat organizada toti aguesti darrèri ans peth grop des Volentaris d’Aran e enguan, ac haràn tanben dera man damb era entitat sense ànim de lucre “Èm Aran Sports Foundation”, ua associacion que cèrque requectar hons entà qu’es joeni esportistes aranesi poguen auer bèques entà seguir en tot practicar esport.

Era intencion ei que des d’Èm Aran Sports Foundation s’agarre era responsabilitat totau dera corsa er an que vie e dejà s’an començat a implementar naues activitats ath torn d’aguesta hèsta. Ath delà dera mès que tradicionau corsa damb es sues distàncies dera mieja maraton, eth trofèu Roland Giné o Arturo Riba s’harà ua olimpiada  infantila ena poblacion d’Arties qu’a coma objectiu qu’es naues generacions de petiti comencen a practicar espòrt des des edats iniciaus e poguen mantier abituds saludables e qui sap se èster bèth dia esportista d’elèit coma es que se vòlen becar ena actualitat.

Es inscripcions entara Corsa e Caminada des 15 pòbles encara son dubèrtes e se pòden hèr de forma presenciau ena plaça d’Aran ath cant deth Conselh Generau d’Aran.