Era chèca Eva Samkova e er austriac Alessandro Haemmerle, guanhadors dera Copa deth Mon de snowboard cross
Es finaus deth dissabte 2 de març an barrat dues magnifiques jornades en que s’a disputat era Copa deth Mon de snowboard cross FIS en Baqueira Beret. Era estacion aranesa, que ja acuelhec aguesta pròva en an 2016, a estat testimòni deth melhor espectacle sus ua taula de snowboard.
Ena competicion femenina, era prumèra plaça siguec entara chèca Eva Samkova, de 25 ans, qu’a liderat totes es baishades enes qu’a participat. Gràcies ad aguest bon resultat, puge un prumèr lòc en classament generau damb 3.400 punts, era madeisha puntuacion qu’obten era nòrd-americana Lindsey Jacobellis de 33 ans qu’a demorat en tresau posicion en pòdium de Beret. Atau es causes, es dues riders aucupen era prumèra posicion deth classament.
Eth dusau lòc en pòdium a estat entara francesa Chloe Trespeuch, de 24 ans e eth quatau lòc entara tanben francesa Nelly Moenne Loccoz, de 28 ans.
Eth guanhador dera finau celebrada ena estacion dera Val d’Aran a estat er austriac Alessandro Haemmerle, de 25 ans, qu’a liderat totes es rondes des finaus.
Eth dusau en crotzar era linha de mèta siguec er australian Adam Lambert, de 21 ans, e eth canadian Kevin Hill, de 32 ans, que tanben pugèc ath pòdium ena Copa deth Mon de SBX de Baqueira Beret en 2016, a barrat eth pòdium damb un tresau lòc. Eth quatau en arribar siguec eth nòrd-american Mick Dierdorff de 27 ans.
Maugrat auer guanhat es classificatòries deth diuendres e mercar un bon ritme enes ueitaus de finau, eth rider dera Reau Federacion Espanhòla d’Espòrts d’Iuèrn (RFEDI), Lucas Eguibar, de 25 ans, a sofrit ua casuda en quataus de finau en ua ajustada baishada. Coma resultat finau eth basc a estat eth 13au dera finau.
Pera sua part er olimpic Regino Hernández, de 27 ans, non a artenhut passar de ueitaus de finau en ua baishada qu’a dominat enquiara darrèra corba, mès un petit error ena conduccion li a penalizat e es sòns rivaus ac an superat abans de mèta. Er andalós a estat eth 26au.
HÒNT: CONSELH GENERAU D'ARAN
