Era Casa deth Haro de Les daurirà es sues pòrtes en 2025
En tot coincidir damb eth detzau aniversari der autrejament deth reconeishement dera UNESCO coma Patrimòni Immateriau
Era Casa deth Haro de Les daurirà coma centre d’interpretacion des Hèstes deth Huec en 2025. Eth Conselh Generau aprovèc recentaments eth projècte executiu tà museitzar eth nau espaci expositiu, que gestionarà era madeisha corporacion a trauès deth hilat de Musèus dera Val d’Aran. Era mòstra compdarà damb un dessenh minimalista e incorporarà elements audiovisuaus coma projeccions, taules interactives e locucions sonores, segontes recuelh eth projècte iniciau.
Es contenguts deth recorregut se dividiràn en diuèrsi airaus, que serviràn entà contextualizar aguesta hèsta de culte ath huec en tot eth Pirenèu, des d’Aran e enquia arribar ara Crema deth Haro de Les, damb eth prètzhèt de reafirmar era relacion qu’era gent deth territòri mantie damb era hèsta atau coma dar a conéisher era tradicion as visitaires e incitar-les a que tornen tà Sant Joan.
Entre es recorsi damb es que compdarà era mòstra, destaque ua vintea de reproduccions de halhes e haros qu’apertien a hèstes de diuèrses poblacions pirenaiques.
Era sua inauguracion coma musèu coincidirà damb eth detzau aniversari dera candidatura transfronterèra de 63 pòbles entà declarar es Halhes Patrimòni Immateriau dera Umanitat dera Unesco, que siguec fin finau aprovada en 2015.
