Era BTT Enduro e Skate en aument en Aran

Era Val d’Aran de cada viatge mès se posicione coma un destin que non sonque destaque en çò que tanh ar esquí damb era estacion d’esquí de Baqueira Beret. Des darrèrs 6-7 ans ençà, es diuèrsi consistòris deth territòri sagen de potenciar e atrèir naui atractius esportius e vinculadi damb era natura entà non depéner sonque d’aguesta sason. 

Ei eth cas per exemple dera bicicleta BTT o Enduro ena qu’eth territòri s’a especializat fòrça pendent es darrèri ans en tot aufrir as visitaires que vien ara Val tota ua sòrta de descensi de montanhes entàs bicicletes. Tot eth parçan dera zòna d’Enduromies d’Arties damb baishades de lèu toti es nivèus, eth parçan de Baricauba o era pròpria estacion d’esquí de Baqueira Beret qu’a abilitat trams tà baishar damb era bicicleta.

Era montanha ei ua forma de hèr espòrt qu’Aran sage de vincular ad aguesti espòrts que de cada viatge an mès adèptes.

Ua auta des disciplines qu’ei emergent ei er skate. E ei qu’enes darrèri ans tanben a auut un increment tanplan naut gràcies ara creacion de diuèrsi Skate Parks o de rampes enes poblacions d’Arties, Vielha o Les. Eth bastiment d’aguestes estructures a permetut er inici d’escòles especifiques d’Skate que vòlen promòir aguest espòrt. Damb era taula non sonque pòden gaudir des diuèrsi skate parks que i a en Aran senon tanben deth Pump Track a on coabiten damb es bicicletes e patinets.