Era Associacion 4 Pautes a organizat ua passejada de mascòtes damb motiu des hèstes de Les

En marc des sues hèstes deth huec, eth pòble de Les a acuelhut ua passejada de mascòtes qu'a organizat era Associacion “4 pautes”, dedicada ath benestar e er emparament des animaus. D’aguesta forma, era associacion a portat quauqui des animaus qu'actuauments se trapen en adopcion e s’a convidat a toti aqueri amants des animaus a portar era sua mascòta en aguesta passejada.

Un des darrèri trionfs dera Associacion 4 pautes siguec eth convèni artenhut damb er Ajuntament de Bossòst, eth prumèr ath que s’arribe damb ua institucion publica en país. Gràcies ada eth, se poderà trebalhar en emparament d’animaus abandonadi ena localitat, entre auti ahèrs.

Aguesta activitat se some a d’auti eveniments qu’era Associacion 4 Pautes amie a tèrme entà fomentar eth respècte as animaus e hèr a préner consciéncia sus era grana importància dera adopcion. Pr'amor que, coma ja didie Gandhi, “era granesa d'ua nacion e eth sòn progrès morau pòden èster jutjadi pera manèra coma es sòns animaus son tractadi”.