Era alugada der arbe d'Arties e d'auti actes de Nadau en Aran, suspenudi

Aguestes imatges, que corresponen ara alugada der arbe de Nadau d’Arties d’est an passat, non se repetiran aguest deseme. 

Aguesta tradicion ère abituau de celebrar-la entath Pònt dera Puríssima, mès enguan era pandèmia deth Coronavirus l’a obligat a suspéner. 

En aguest sens, era EMD d’Arties e Garòs a informat as vesins d’Arties que en aguest 2020 non s’harà cap tipe de concentracion ena plaça Urtau dera poblacion entà esvitar aglomeracions que non complisquen damb era distància sociau reglamentada pes autoritats.⁣

En parallel, era nauetat plantejada per ajuntament serà era de lançar es fanaus ath cèu cadun des de casa sua eth dimenge entàs 18:00 ores. .

Pera sua part, er Ajuntament de Vielha e Mijaran a decidit suspéner era hèsta de Cap d'An que pendent es darrèri ans s'auie celebrat ena plaça dera glèisa de Vielha. 

Per tant, enguan non i aurà es actes d'aguesta jornada coma son es sessions de musica des dj's, ne tanpòc eth repartiment de radims entà celebrar eth cambi d'an.

Tanpòc se celebraràn es campanades dera Net de CAp d’An en Bagergue. Era celebracion, qu’amassaue a centenats de persones ena plaça dera glèisa dera localitat, ei incompatible damb es mesures entà contier era propagacion dera Covid-19.