Era AF Les finalize era sason damb un gran empat (4-4) en camp der Arbeca CF

Era AF Les a finalizat era sason pendent aguesta darrèra dimenjada damb un gran empatat a 4 gòls en camp der Arbeca CF. Un finau de sason damb fòrça gòls, qu'a estat un exemple de çò qu'a estat era sua tempsada d'enguan. Eth partit siguec fòrça disputat e es dues equipes s'alternèren en marcador. Es locaus comencèren peth dessús damb dus gòls enes prumères 15 menutes (Sergi Moreno e Carles Camí sigueren es autors). Era reaccion des aranesi siguec espectaculara e ara mieja ora de partit dejà auien capvirat eth resultat damb 3 gòls (Luis Lanza, Sergio Vicente e Luis Lanza un aute viatge). Damb aguest gran resultat (2-3) s'arribèc ara mieja part.

Dejà ena 2au part deth partit er Arbeca gessec molt fòrt e ena menuta 57 empatèc damb un gòl de Marc Claret, que deishaue eth partit fòrça dubèrt. Eth madeish Claret auancèc as locaus ena menuta 72, mès luenh de deishar-se anar, era AF Les artenhec er empat ena menuta 78 damb un gòl d'Enrique Ramos. Fin finau 4-4, en un partit plan disputat, damb fòrça gòls e desparièrs cambis en marcador.

Damb aguest resultat, era AF Les finalize ena auant-darrèra posicion (16au) deth Grop 13 dera 3au Catalana damb 24 punts. Fin finau a artenhut 7 victòries, 3 empats e 22 derròtes, damb un balanç de 61 gòls a favor e 104 en contra.

Era pròplèu sason, sajaràn de non patir entà mantier era permanéncia coma enguan, que s'obtenguec sonque ua jornada abantes de finalizar eth campionat. Mès damb es grani problèmes de distància entà disputar es partits e des convocatòries de jogadors que i a agut ath long dera sason, era permanéncia ei eth màger prèmi que se'n pòt amiar eth club aranés.