Er IEA-Academia aranesa dera lengua occitana organize ua jornada sus mieis de comunicacion en aranés

Er Institut d'Estudis Aranesi- Academia aranesa dera lengua occitana a organizat entath pròplèu diuendres, 7 de junhsèga as 18:00 ores, ua jornada entà parlar dera lengua aranesa e eth sòn usatge enes mieis de comunicacion.

Er eveniment, qu'aurà lòc ena sedença der IEA, compdarà damb era preséncia des jornalistes responsables des mieis de comunicacion en lengua aranesa, correrà a cargue deth Vicesindic d'Aran, Luis Carlos Medina e eth president dera Academia, Jusèp Loís Sans e serà dubèrt a toti es interessats. 

Actuaument, encara qu'aumente eth nombre de gent que lieg e escriu en aranés, eth sòn emplec sociau seguís baish en favor deth castelhan. Segontes donades deth 2013, eth 55,1% d'aranesi parlen abituauments en castelhan, e sonque un 17,6% ac hèn en aranés, ath temps qu'un 16,4% utilizen eth catalan e eth 10,6% d'autes lengües, que facilament pòden acabar incorporant-se ath grop majoritari deth castelhan.

Deuant d'aguesta situacion, ena jornada organizada per IEA-Academia aranesa dera lengua occitana, se preten parlar sus quin papèr an de jogar e coma pòden influïr es mieis de comunicacion presents ena Val d’Aran en relacion ara lengua, ara sua coneishença e ath sòn emplec.

Pendent es darrèri 35 ans, damb era recuperacion dera democracia, era Val d'Aran a compdat damb mieis de comunicacion tant publics coma privadi en diferents formats: premsa escrita (Avui e Aué), revistes (Aran Nau, TOT Aran, Era Borrufa), ràdio (Catunya Ràdio e Catalunya Informació), TV (Tv3-Meddia Aranés, 3/24, BTV e Aran TV) e, darrèrament, tanben mieis digitaus (Aran Nau Digitau e Aué TV).

Des der IEA-Academia aranesa dera lengua occitana, se prepause ua jornada de debat e reflexion sus eth papèr des mieis de comunicacion ena preservacion e promocion dera lengua coma actors imprescindibles ena societat.

"Ar aranés li cau conformar-se damb era preséncia actuau enes mieis de comunicacion? Sense uns mieis avienti, quin serà eth futur dera nòsta lengua? Quin papèr an de jogar es institucions? Existís ua veritabla iniciatiua de mieis de gestion privada damb potenciau entà impulsar mieis de comunicacion o produccions audiovisuaus en aranés?" seran quauques des preguntes as que se tractarà de dar responsa en aguesta jornada