Er equip de govèrn de Vielha e Mijaran s’amasse damb era presidéncia dera Federació Catalana d’Esports d’Hivern entà refortilhar un acòrd de collaboracion entàs pròplèu ans

Er Ajuntament de Vielha e Mijaran seguís damb er objectiu de que Vielha e Mijaran e, mès concretament, era installacion deth Palai de Gèu, sigue epicentre esportiu deth gèu en Pirenèu enes pròplèu ans. En aguest sens, er equip de govèrn municipau s’a amassat damb eth director dera Federació Catalana d’Esports d’Hivern, David Samper, e eth coordinador d’aguesta federacion, Jordi Haro, en tot premanir desparières accions.

D’aguesta manèra, s’a acordat era creacion d’un convèni de collaboracion entre ambdues institucions entàs pròplèu 4 ans entà que Vielha pogue acuélher desparières eveniments esportius de gèu, atau coma stages de tecnificacion de patinatge artistic.

A compdar dera redubertura dera pista de gèu en seteme de 2022, eth Palai de Gèu a acuelhut diuèrsi stages de tecnificacion damb era preséncia d’entrenadors internacionaus: Era dimenjada deth 23 ath 25 de seteme, lèu ua quarantia d’alumnes de tota Espanha gaudiren des entrenaments deth coreògraf italian, Lorenzo Magri. Atau madeish, es dies 3 e 4 de deseme, eth Palai de Gèu acuelhec eth stage dera entrenadora e patinadora Sara Hurtado.

En çò que tanh a competicions, eth 14 e 15 de gèr, se celebrèc en Palai de Gèu era Copa Vielha-Copa Catalunya de patinatge artistic damb mès de 60 patinadors arribadi d’Espanha e Andòrra, en tot tornar a èster un succès organizatiu.

Tanben cau remercar, que damb era redubertura deth Palai de Gèu, tanben s’an realizat stages intensius e corsi de patinatge artistic autant en iuèrn coma en ostiu, en tot emplegar era pista de gèu pendent tot er an.

“Des der equip de govèrn de Vielha e Mijaran trabalham des de hè fòrça ans entà fomentar era practica des espòrts de gèu, e ac hèm damb era principau installacion esportiua qu’auem en territòri, coma ei eth Palai de Gèu. Per aguest motiu, volem seguir en tot trabalhar damb era Federació Catalana d’Esports d’Hivern, entà apropar ath municipi stages de tecnificacion e eveniments esportius internacionaus, e ac sageram damb un convèni entàs pròplèus 4 ans ”, comente eth baile de Vielha e Mijaran, Juan Antonio Serrano.

“Èm des pòqui municipis en Espanha que trabalhe e manten ua installacion de gèu, e volem contunhar en tot apropar eveniments que mos placen coma epicentre esportiu en Pirenèu damb entrenadors internacionaus e patinadors que poguen arribar autant d’Espanha coma d’Andòrra e d’autes parts d’Euròpa”, ahig eth còsso d’espòrts, David Moreno.