Er Ajuntament de Vielha e Mijaran organize aguesta tardor eth cicle “Teatre Familhar 2023” que s’amiarà a tèrme un viatge ath mes, d’octobre a deseme

Dempús der exit des edicions de 2021 e 2022, enguan s’a premanit un nau cicle compausat de 3 espectacles qu’auràn lòc un viatge ath mes, ena jornada de dissabte, a compdar des 18 ores ena Sala Era Audiovisuau de Vielha.

Eth cicle s’encète eth 21 d’octobre, damb era actuacion que pòrte per nòm “Genèrics” (dera companhia La Pantomima), qu’ei un espectacle infantil de manuquetes a on s’expliquen dus condes damb era igualtat de genre en toti es airaus coma hiu conductor.

Eth 18 de noveme, era actuacion “Kàtia” (dera companhia Ka Teatre), mos parle de voler saber, deth besonh de trapar es nòstes origines, dera voluntat de rebrembar e compréner d’a on venguem. Era istòria d’ua mair e era sua hilha, qu’emprenen un viatge entà sajar de respóner es qüestions que somet era petita.

E, fin finau, eth 16 de deseme, arribe era òbra “Ara ve Nasdal” (dera companhia El Replà), damb un espectacle que mos harà arrir fòrça, a on es protagonistes premanissen Nadau damb un pialèr d’activitats tipiques d’aguestes hèstes.

“Er equip de govèrn der Ajuntament de Vielha e Mijaran auem establit un programa variat entà que pendent aguesta tardor tota era familha pogue gaudir de diuèrsi espectacles agradius”, comente era còsso de cultura, Raquel Martínez. E ahig que “era bona acuelhuda qu’aguest tipe d’activitats culturaus a enes familhes mos permet seguir en tot apostar per apropar companhies de prestigi, en tot emplegar, en aguest cas, Era Audiovisuau coma lòc de celebracion d’aguesti espectacles”.


HÒNT: AJUNTAMENT VIELHA E MIJARAN