AUE TV
    1. AUE TV

    Er Ajuntament de Vielha e Mijaran met en marcha ua enquesta dirigida as joeni deth municipi entà acabar de desvolopar eth Plan de Joenessa Municipau 2024-2027

    04/12/2023

    Era enquesta ei dirigida as joeni des 12 as 30 ans que viuen, estudien, trabalhen o agen neishut en Vielha e Mijaran, entà conéisher prigondament quini son es sòns besonhs

    Er airau de joenessa der Ajuntament de Vielha e Mijaran a metut en foncionament ua enquesta entara joenessa damb era que s’aprigondirà en coneishement des besonhs des joeni/enes deth municipi.


    Aguesta accion ei dirigida a toti aqueri que estudien, viuen, trabalhen o agen neishut en Vielha e Mijaran, e que comprenen entre es 12 e es 30 ans. Gràcies a d’aguesta enquesta, eth govèrn municipau acabarà de dar forma ath Plan de Joenessa Municipau 2024-2027. Era enquesta, que non supause mès de 10 menutes de temps entà responer-la, serà disponible pendent aguest mes de deseme.


    Era enquèsta ei totaument anonima e confidenciau. Es donades seràn analisades pera Oficina de Joenessa deth Conselh Generau d’Aran.


    “Des der equip de govèrn der Ajuntament de Vielha e Mijaran mos trapam en tot acabar de balhar forma ath Plan de Joenessa Municipau 2024-27, en quau desvoloparam fòrça activitats dirigides ath sector mès joen deth municipi. Damb es resultats d’aguesta enquesta, acabaram de conéisher es sòns besonhs, entà poder decidir era totalitat des activitats previstes entàs pròplèu ans”, comente eth còsso de joenessa de Vielha e Mijaran, David Moreno. E ahig que “pendent es darrèri ans auem desvolopat fòrça activitats entàs joeni, en tot emplegar era installacion municipau qu’ei eth Centre de Joenessa “Antara”, e gràcies as boni resultats d’usatgèrs assolidats, contunharam en tot hèr fòrça mès accions, en tot escotar-les e que se hèsquen sòn er emplec e es activitats a realizar en equipament”.


    HÒNT: AJUNTAMENT VIELHA E MIJARAN 
    Manu Moga
    Tornar