Er Ajuntament de Vielha e Mijaran installe desfibrilladors en tres espacis cardioprotegidi

Vielha compde des d'ara damb tres espacis cardiorotegidi. Er Ajuntament municipau a installat tres desfibrilladors DEA de facil accès en Palai de Gèu, en Palai d'Espòrts e en Casau deth Jubilat entà garantir era assisténcia sanitària deuant d'urgéncies medicaus en menor temps possible. 

Aguest esturment poderà èster utilizat tant per personau sanitari coma per personau autorizat en casi d'estancada cardiaca. Enes pròplèus setmanes se realizaràn corsi de formacion e reciclatge a tot eth personau tecnic esportiu der Ajuntament atau coma as responsables e as coordinadors des activitats que se realizen en Palai d'Espòrts e eth Casau deth Jubilat.

Eth Baile der Ajuntament de Vielha e Mijaran, Juan Antonio Serrano, declaraue "contunham trabalhant tàs nòsti vesins e tàs usatgèrs des nòstes installacions municipaus, tant esportiues coma associatiues, en tot aufrir-les espacis segurs enes quaus en cas d'emergéncia pogam actuar çò mès lèu possible".

Damb era abilitacion d'aguesti espaci cardioprotegidi eth consistòri aufrís ara ciutadania un esturment que pòt arribar a sauvar vides en casi d'urgéncia, per tant, se tracte d'ua grana notícia entàs usatgèrs d'aguesti espacis.

IMATGE: AJUNTAMENT DE VIELHA E MIJARAN