Er Ajuntament de Vielha e Mijaran inície eth projècte entà acabar de substituïr es canerades de fibrociment de Vielha
Aguesta intervencion s’emmarque laguens des accions deth Plan Nacionau entara eradicacion der amiant en Catalonha abans de 2028 coma fixe era Union Europèa
Er Ajuntament de Vielha e Mijaran se trape en tot començar a desvolopar eth projècte entà acabar de substituïr es canerades de fibrociment qu’encara i a aué dia en desparièrs endrets de Vielha.
Aguesta intervencion s’emmarque laguens des accions deth Plan Nacionau entara eradicacion der amiant en Catalonha en periòde 2023-2032, damb er objectiu, fixat pera Union Europèa, de retirar er amiant de totes es bastisses publiques abans de 2028 e de tot eth territòri abans der an 2032. Ei precisament en 2032 quan bona part d’aguest amiant caducarà e ei de besonh retirar-lo.
Er amiant se hec a servir de manèra generau entre es ans 1950 e 1990, ja qu’ère un materiau abondiu e economic, mès a compdar de 2002 se proïbic totaument. Eth que ja ère installat se podie hèr a servir enquiara fin dera sua vida utila. Eth cicle de vida estimat ei de 30 a 50 ans, per tant, se calcule que en 2030 mès deth 85% d’aguesti materiaus auràn superat aguesta vida utila.
Des der Ajuntament de Vielha e Mijaran s’an realizat desparières intervencions en tot eth municipi entà eliminar eth fibrociment des canerades d’aigua. En aguest sens, i a agut projèctes, coma era substitucion des canerades des carrèrs: Avenguda Pas d’Arró, Carrèr Montcorbison, Carrèr Major (e carrèrs transversaus) o Carretèra de Gausac, entre d’auti, damb ua inversion totau superiora as 500.000€.
“Er equip de govèrn de Vielha e Mijaran trabalhe des de hè diuèrses legislatures en suenh e mantenement deth servici der aigua correnta deth municipi, coma un des principaus èishi d’actuacion. En aguest sens, amiam a tèrme era reforma e mantenement de toti es depòsits d’aigua, mès tanben dera qualitat des canerades per a on circule era aigua. Auem hèt un cambi de bona part d’aguestes canerades de fibrociment de Vielha, e ara acabaram de substituïr es que manquen, entà poder garantir era qualitat deth servici d’aigües municipau”, comente eth baile de Vielha e Mijaran, Juan Antonio Serrano.
