Er Ajuntament de Vielha e Mijaran inície es òbres de milhora des escales e era plataforma d’accès ara glèisa Sant Miquèu de Vielha

A conseqüéncia des climatologies advèrses que se produsissen en territòri sustot ena tardor e er iuèrn, damb eth gèu e era sau, aguesti elements demorauen en un estat deficient, en tot supausar un grèu risc entara gent qu’accedís ath temple o que se trape ena plaça dera glèisa.

Es actuacions consistissen ena demolicion des escales d’hormigon prefabricat existentes, en tot substituïr-les per ues naues que son de granit e damb un acabat qu’evitarà es possibles esguitlades. Atau madeish, eth paviment dera plataforma d’accès tanben se substituís, en tot plaçar-ne un de granit damb eth madeish tipe d’acabat. Entà acabar de refortilhar era seguretat, s’i plaçaràn parabandes de supòrt e jardinères de proteccion.

Aguesta intervencion tanben garantise er accès as persones damb mobilitat redusida a trauès dera entrada plaçada ena façada oèst.

Era tor e er accès ara glèisa son proprietat der Ajuntament de Vielha e Mijaran, e damb aguesta actuacion se preten dignificar un des principaus elements patrimoniaus deth municipi, coma ei era glèisa de Sant Miquèu, bastida enes sègles XIII-XIV.

Eth projècte de milhora des escales e plataforma d’accès ara glèisa Sant Miquèu de Vielha durarà, apuprètz, 3 mesi e compde damb un pressupòst de 53.839,66 €.

“Damb es trabalhs de milhora en accès ara glèisa de Sant Miquèu de Vielha, dignificam un des principaus elements patrimoniaus e qu’atrè fòrça torisme en nòste municipi. Ac hèm damb granit, entà qu’age un aspècte uniforme damb era rèsta dera glèisa, en tot balhar mès berèsa ath conjunt dera bastissa”, comente eth baile de Vielha e Mijaran, Juan Antonio Serrano. E ahig “qu’aguest ostiu ja serà prèst entà qu’era gent ac pogue visitar damb totes es mesures de seguretat”.


HÒNT: AJUNTAMENT VIELHA E MIJARAN