Er Ajuntament de Vielha e Mijaran executarà en 2022 un plan d’urbanizacion e adeqüacion des trepadèrs de diuèrsi carrèrs de Vielha

Aguesta actuacion, que s’iniciarà ena pròplèu primauera, supausarà era reforma des trepadèrs, damb eth sòn agraniment, e era eliminacion de places de parcatge, entà melhorar era accessibilitat e era circulacion des pedons. En aguest sens, eth solèr serà de granit, en tot auer-i acabats de color vermelh e nere. I aurà carrèrs a on se profitarà tanben entà realizar ua melhora deth sanejament.

Eth projècte contemple un totau de sèt actuacions: Ena Avenguda Castièro, Avenguda dera Tuca, es carrèrs Clòses, Quate Lòcs, Pomaròla e Anglada, e eth camin de Casau.

Entà qu’es vesins des carrèrs afectadi agen mès coneishement sus es òbres que s’amiaràn a tèrme, er equip de govèrn der Ajuntament de Vielha e Mijaran realizarà un seguit d’amassades damb eri entà presentar-lis eth projècte. Aguesta setmana ja s’a començat damb ua amassada damb es vesins dera Avenguda Castièro. En aguesta via ei previst qu’es òbres comencen dempús de Pasca, e que poguen èster acabades abantes dera arribada der ostiu.

“Damb aguest projècte d’urbanizacion e adeqüacion des trepadèrs de diuèrsi carrèrs de Vielha, volem amiar a tèrme ua melhora d’aguesti espacis publics, en tot favorir ua melhora accessibilitat e circulacion entàs pedons”, comente eth baile de Vielha e Mijaran, Juan Antonio Serrano. E ahig que “en cas dera Avenguda Castièro plantejam ua ampliacion des trepadèrs entà potenciar aguest èish comerciau”.


HÒNT: AJUNTAMENT VIELHA E MIJARAN