Er Ajuntament de Vielha e Mijaran comence un procès de participacion ciutadana entà modificar es normes que regulen era installacion de pannèus solars, e era dubertura enes cubèrtes e lucanes en municipi

Es Normes Subsidiàries e Complementàries de Planejament dera Val d’Aran e eth Planejament Urbanistic de Vielha e Mijaran non contemplen es pannèus solars, era regulacion sus es cubèrtes ei pòc precisa, mentre qu’era referenta as lucanes dificulte eth sòn emplec coma solucion abituau, pr’amor que se regule ua amplada redusida e admet era possibilitat de substitucion per hièstres integrades en plan dera cubèrta.

Damb aguest procès se preten milhorar era participacion des ciutadans en procediment d’elaboracion de normes, damb caràcter prealable ara “Modificacion des Normes Subsidiàries e Complementàries de Planejament dera Val d’Aran en referéncia ara regulacion des pannèus solars entar autoconsum, dubertures enes cubèrtes e es lucanes”. D’aguesta manèra se requecte era opinion des sectors mès representatius potenciaument afectadi pera futura norma.

Atau madeish, se preten hèr compatible era installacion de pannèus solars e hièstres integrades en plan dera cubèrta damb eth tradicionau païsatge aranés de cubèrtes de pissarra damb dubertures formalizades mejançant lucanes.

Es ciutadans, organizacions e associacions qu’atau ac considèren poiràn hèr arribar es sòns plantejaments pendent es pròplèu dètz dies mejançant era sua presentacion en quinsevolh des lòcs indicadi en article 16 dera Lei 39/2015, d’1 d’octobre, deth Procediment Administratiu Comun des Administracions Publiques.


HÒNT: AJUNTAMENT VIELHA E MIJARAN