Er Ajuntament de Vielha e Mijaran auance enes trabalhs de milhora e condicionament des installacions deth cementèri “Sant Miquèu “ de Vielha

Er equip de govèrn realize ua reforma generau fòrça importanta ath long deth cementèri. En aguest sens, s’an sanejat es murs e façades des cavòts ja existents, en tot reparar es henerècles produsides peth pas deth temps, era umiditat e es gelades en epòques heiredes. Atau madeish, s’a tornat a pintar, entà milhorar era imatge estetica.

Ua des accions mès subergesentes ei era ampliacion deth numerò existent de cavòts, a conseqüéncia dera contunhada demanda que se genère. En totau s’an bastit 18 naui cavòts.

D’aute biais, s’a installat un enlumenat de baisha intensitat entà qu’es familhars poguen auer ua milhor visibilitat, sustot, en epòques de mens lum solar (tardor e iuèrn), mès en tot evitar era contaminacion luminica. Ath delà, s’a plaçat un sistèma d’aiguatge programat automatic damb aspersors, e que dispause d’un sensor de pluja, entà que pogue activar-se enes moments de manca d’aigua e non degalhar-la pendent es tempèstes, en tot milhorar era eficiéncia der emplec der aigua.

En çò que tanh as espacis transitables, s’a ampliat era zòna centrau deth cementèri, ath cant deth camin principau e des cavòts bastidi en 2004, damb eth bastiment de naui camins que permeteràn un milhor accès as cavòts. En aguest sens, tanben s’adapten es camins existenti, entà que toti agen un paviment damb un acabat omogeni.

Aguesti trabalhs iniciadi en junhsèga, s’an acabat a temps entà poder èster contempladi de cara ath pònt de Tot Sants que comence aguesta dimenjada e que s’alongarà enquiath pròplèu 1 de noveme.

Manquen diuèrsi prètzhèts que s’amiaràn encara pendent es pròplèu setmanes, coma son er estat des dues pòrtes d’accès ath cementèri, en tot sanejar-les e tornar-les a pintar, atau coma finalizar es trabalhs de jardineria, en tot talhar era èrba enes desparièrs espacis a on se trapen es cavòts, en tot facilitar eth sòn accès, e milhorar era imatge estetica generau d’aguest endret.

“Es òbres de milhora e ampliacion deth cementèri de Vielha qu’executam enguan èren fòrça de besonh, pr’amor qu’aguest equipament meritaue un lauat de cara important a conseqüéncia deth pas deth temps e des condicions climatologiques e, sustot, ua reforma que permet milhorar era sua qualitat”, comente eth baile de Vielha e Mijaran, Juan Antonio Serrano. E ahig que “damb er aument dera poblacion tanben calie mès cavòts e, per tant, auem ampliat eth numerò existent actuaument, en tot adaptar-lo ara demanda que i a. Pendent aguest pònt de Tot Sants, es familhes ja pòden contemplar totes es mesures qu’auem acabat, en tot dignificar aguest endret”.


HÒNT: AJUNTAMENT VIELHA E MIJARAN