Er Ajuntament de Vielha e Mijaran apròve era regulacion des licéncies d’abitatges toristics compartidi

Era moratòria que entrarà en vigor se plantège coma un acte preparatòri, per’mor de, posteriorament, poder assumir e ordenar avientament en municipi de Vielha e Mijaran aguesta tipologia de lotjament toristic definida en Catalonha coma “llar compartida”, d’acòrd damb era regulacion establida peth Decrèt 75/2020, de 4 d’agost, de torisme de Catalonha.

Aguesta accion supause ua mesura preventiua, damb er objectiu d’encetar un debat sus aguesta tematica de lotjament toristic e un consegüent analisi tecnic qu’estudie mielhor era sua regulacion e adaptacion en territòri.

Es viuendes toristiques compartides favorissen er aument deth prètz deth loguèr des abitatges e dificulten er accès de familhes en mercat de loguèr. Ath delà, tanben supause ua problematica entad aquera gent que ven a trabalhar era sason d’iuèrn o d’estiu, donques que non tròben cases entà poder residir a causa deth gran còst economic. D’aguesta forma, autant trabalhadors coma empresaris se ven perjudicadi. Pendent er iuèrn, era Val d’Aran acuelh un gran nombre de professionaus entà poder corbir lòcs de trabalh imprescindibles enes servicis toristics qu’aufrís eth territòri. Ua problematica que s’ahig ara proliferacion des lotjaments d’us toristic existenti.

“Aguesta modificacion des normes en relacion as viuendes toristiques compartides preten, prioritariament, garantir eth dret fonamentau der accès ara viuenda as vesins e vesies de Vielha e Mijaran a un prètz digne, en tot assegurar era abitabilitat, era convivéncia, e eth descans de tota era ciutadania”, comente eth baile de Vielha e Mijaran, Juan Antonio Serrano.


HÒNT: AJUNTAMENT VIELHA E MIJARAN