Er Ajuntament de Vielha e Mijaran adapte diuèrses taxes entà garantir era prestacion des servicis municipaus

A compdar de 2017, quan se detectèc qu’eth 60% deth hilat ère obsolet e quauqui des sòns depòsits patien damatges estructuraus, s’a pogut intervier en 30% deth hilat e en tres des depòsits que presentauen pejor estat, en tot deishar aguesta infrastructura enes condicions avientes entà garantir eth subministrament d’aigua damb es estandards de qualitat en vigor en sègle XXI.

Actuauments, ei de besonh intervier enes onze depòsits municipaus qu’encara non an estat reabilitadi e renauir un 30% deth hilat d’aigües que contunhe en tot presentar deficiéncies enes canalizacions. Totes aguestes accions tanben compòrten er apariament e modernizacion dera pavimentacion de diuèrsi carrèrs que hè mès de 50 ans a on no s’auie actuat. En aguest sens, aguest ostiu eth consistòri se trape en tot modernizar aguesti servicis en casc antic de Vielha, enes carrèrs que confluïssen damb eth carrèr Major, a on se destine un totau de 350.000 €.

D’aute biais, eth consistòri tanben a aprovat era modificacion de d’autes taxes coma er impòst de circulacion de veïculs, en tot incrementar-se en 0,25 punts e ua modificacion ena taxa de construccions, installacions e òbres, en tot aumentar en 1,1 punts. Atau madeish, s’aplicaràn naues bonificacions ara ciutadania: as viuendes protegides (75%), adaptacions d’accessibilitat (50%) e melhores ena eficiéncia energetica e naui sistèmes de profitament termic (50%).

Aguestes modificacions permeteràn mantier es servicis qu’aufrís er Ajuntament de Vielha e Mijaran ara ciutadania, autant coma ampliar era dotacion economica des convènis damb es entitats menors descentralizades.


HÒNT: AJUNTAMENT VIELHA E MIJARAN