Er Ajuntament de Vielha e Mijaran a iniciat es trabalhs dera 2au fasa de milhora ena estructura deth Palai de Gèu

Aguesti trabalhs compòrten eth sanejament des bigues dera prumèra planta dera infraestructura. En prumèr lòc, s’a començat damb er airau des piscines, e un viatge finalizada aguesta intervencion, se començarà damb er airau dera pista de gèu. Aguesta actuacion evitarà possibles saturacions des bigues en futur.

Ath delà, se profitarà entà realizar mès milhores ena installacion, coma son eth cambi der enlumenat de tota era prumèra planta, damb foguièrs LED naui, que generarà ua milhora energetica importanta. E tanben se realizarà eth cambi deth laminat de PVC deth vas dera piscina grana a on i auie henerècles, en tot supausar ua milhora considerabla ena sua impermeabilizacion, e evitar filtracions d’aigua ena planta baisha.

Tanben se profitarà entà cambiar de lòc es compressors dera pista de gèu, pr’amor qu’er emplaçament actuau genère un tapatge qu’afècte as vesins que viuen ath cant deth Palai de Gèu, en tot plaçar-les en un nau espaci mens perjudiciau. Atau madeish, tanben s’aquerissen naues maquines mès modèrnes entàs usatgèrs deth gimnàs.

Ei previst qu’es trabalhs en airau des piscines finalizen pendent eth mes d’hereuèr, de manèra que ja se poderà gaudir d’aguest espaci aguest madeish iuèrn. D’aute biais, es trabalhs ena pista de gèu poirien èster prèsti a miejans de març.

Era licitacion deth cambi des compressors dera pista de gèu a demorat desèrta degut a que cap empresa a presentat aufèrta, en tot endarrerir es tramits administratius, de manèra que pòt afectar ara finalizacion des trabalhs e, per tant, as terminis de dubertura previsti.

Cau rebrembar, qu’en ostiu, dempús de finalizar era prumèra part d’aguesta intervencion ena estructura deth Palai de Gèu, se tornèc a abilitar es servicis abituaus dera planta baisha der equipament, autant esportius coma des empreses que dispausen de locaus.

Damb era finalizacion d’aguesta 2au fasa de trabalhs, eth Palai de Gèu serà totaument reformat damb ua inversion de 539.264,73€, en tot recuperar totes es activitats abituaus abantes deth sòn barrament causat pes grèus damatges detectadi ena estructura en març de 2021, que supausaue un naut perilh entàs usatgèrs e trabalhadors.


HÒNT: AJUNTAMENT VIELHA E MIJARAN