Er airau de logopedia der Espitau Val d’Aran realize un stage en Hospital de l'Esperança, apertient ath Consorci Parc de Salut Mar

En tot cercar milhorar eth servici que s’aufrís ara ciutadania, er airau de logopedia der Espitau Val d’Aran a realizat, aguest mes de gèr, un stage en Hospital de l'Esperança de Barcelona.

Pendent aguesta estada formativa, era responsabla der airau de logopedia der espitau aranés a realizat foncions d’exploracion clinica, avaloracion, protocòls de tractament de reabilitacion e interpretacion de videofluoroscòpies en contèxte deth pacient neurologic agut espitalizat e tanben en ambulatòri.

"Qu'es nòsti professionaus sanitaris poguen conéisher qué passe dehòra d'aciu e agen era oportunitat de seguir era sua formacion ei tanben un ahèr en qué trabalham des deth govèrn deth Conselh Generau d’Aran", afirme era conselhèra d’Igualtat, Salut e Benèster, Maria Vergés. Que hig que: "en cas concrèt dera logopèdia aguest stage a servit entà comprobar qu'eth servici qu'aufrim ei ath madeish nivèu d'un centre de referéncia coma ei er Hospital de l'Esperança tot e compdar damb fòrça mens recorsi”.