Dus esquiaires heridi, un d'eri grèu, en èster atrapadi per un laueg en Vinheta

Dus esquiaires se trapen espitalizadi, un d’eri en estat grèu, en èster atrapadi per un laueg mentre esquiauen dehòra de pistes ena zòna dera Vinheta, en Naut Aran.

Es hèts an passat tath torn des 14.45 ores d’aguesta tarde, quan es servicis d'emergéncia an arrecebut er avís. Segontes explique eth govèrn d’Aran,un totau d’onze efectius deth GRM s’an desplaçat enquiara zòna. 

Aquiu an trabalhat damb era equipa de pistes de Baqueira-Beret pendent ua ora e mieja en ues condicions fòrça complèxes pr’amor dera meteorologia e era pòga visibilitat.

Andús esquiaires an estat trasladadi ar Espitau Val d’Aran, mès eth mès grèu a auut d’èster evacuat damb er elicoptèr deth SEM entà Lhèida.

Ua tresau persona qu'acompanhaue as victimes a resultat ilesa.