Dubèrtes es preinscripcions escolars enes escòles dera Val d'Aran

Eth director des Servicis Territoriaus deth Departament d’Ensenhament de Lhèida, Miquel Angel Cullerés, a comunicat dejà er inici deth procés de preinscripcion entath cors escolar 2017-2018 entàs ensenhaments obligatòris.

Encara qu’enquia que non se produsisque eth tancament des preinscripcions non se coneisheràn es donades oficiaus, se sap dejà qu'ena Escòla Garona de Vielha, qu’enguan a compdat damb, aproximadament 500 mainatges e mainades, se demore un increment d’alumes en P3.

Era Escòla Sant Ròc de Bossòst, que comencèc eth passat cors damb 90 alumnes, demore entre 8 e 10 naues inscripcions entath següent, e era Escòla Ruda de Salardú, qu’a compdat enguan damb 60 alumnes demore tanben qu’eth nombre d’inscrits contunhe creishent coma enquia ara.

Damb eth periòde de preinscripcions comencen tanben es jornades de pòrtes dubèrtes enes estudis, entà qu’es pares poguen decidir quina escòla s’adapte milhor as necessitats des sòns hilhs.

Peth moment, es donades d’alumnes ena Val d’Aran se mantien e des des Escòles se demore que seguisquen incrementant. S’aurà de demorar enquia eth barrament des preinscripcions entà saber s’eth nombre d’alumnes ei superior o inferior en aguest pròplèu cors escolar.