Detengut en Vielha un camionèr que condusie temeràriament e dejós des efèctes der alcoòl

Segontes informen es Mòssos d’Esquadra, ager siguec detengut un camionèr laguens deth tèrme municipau de Vielha coma pressompte autor d’un delicte còntra era seguretat viau per circular de manèra temerària e dejós des efèctes der alcoòl.

Eth conductor, un òme de nacionalitat polonesa d’uns 60 ans, siguec detengut ath torn des sies dera tarde mejançant un contròl preventiu de trànsit des Mossos ara nautada deth quilomètre 162 dera carretèra N-230.

Es agents parèren eth camion per aucupar eth carril contrari en diuèrses ocasions. En detectar qu’eth camionèr presentaue simptòmes evidents d’auer prenut begudes alcooliques, es Mòssos d’Esquadra procediren a realizar-li era pròva d’alcoolemia, a on dèc un resultat positiu de 0,89mg/l, ei a díder, sies còps mès naut qu’eth maxim permetut.

Dempús d’èster detengut ager, eth conductor a passat aguest madeish maitin a disposicion judiciau deuant deth jutjat d’instruccion en foncions de guardia de Vielha e, peth moment, se desconeish mès informacion.

Contunharam informant.