Descartada era autovia entara Val d'Aran entà optar per ua carretèra 2+1
17/08/2022
Eth Ministèri de Transpòrts, Mobilitat e Agenda Urbana (Mitma) a encargat per 1,6 milions, un contracte de servicis entara redaccion deth projècte "Condicionament dera carretèra N-230 coma carretèra 2+1. Tram: Benabarre-Sopeira?. Aguest estudi durarà dus ans e a compdar d'alavetz s'aurà de fixar terminis entath sòn bastiment
Era solucion de condicionament dera carretèra N-230 se coneish coma "Carretèra 2+1": Ua unica cauçada damb tres carrils a on eth centrau servís tà auançar sense auer d'aucupar eth carril contrari. Permeterà melhorar de forma «significativa» eth nivèu de servici e era seguretat viau, mercés ara separacion entre sensi.
Redusís era sinistralitat e a un mendre impacte ambientau damb ues autes possibles solucions d'aumentacion de capacitat coma eth desdoblament. Es clausules deth concors establissen qu'eth projècte sajarà de profitar ath maximal eth traçat existent entre Benabarre e Areny, en tot redusir ath maximal era explanacion de naui terrens e, s'ei precís, en tot redusir amples de carril. S'estudiarà era possibilitat de separar es sensi dera marcha mejançant hites elastiques de baliçament.
Entre Areny e Sopeira serà de besonh combinar er ampliament dera plataforma actuau e eth bastiment de naues variants entà melhorar eth traçat.
Eth projècte aurà de reordenar es interseccions damb carretères e camins, e includir rotondes entà facilitar es cambis de sens, passi entà animaus a desparièr nivèu dera cauçada.
Damb es naues previsions deth ministèri, era autovia A-14, prevista hè dus decènnis entre Lhèida e era Val d'Aran, acabarà, fin finau, en Benabarre. Eth tram bastit enquiara ei de 16 quilomètres entre eth cap-lòc deth Segrià e Almenar, e non i a data prevista entàs òbres des 34 restants.
En Sopeira acabarà era carretèra 2+1, e des d'aquiu enquiath tunèl de Vielha, un projècte de 2018 apuntaue a melhorar eth traçat damb naui pònts e tunèls.
HÒNT: ARAN NOTICIES WEB
HÒNT: ARAN NOTICIES WEB
Manu Moga