Deman: maraton de donacion de sang en Vielha!

Era Associacion de Donants de Sang dera Val d’Aran a premanit entà deman 10 de noveme ua naua edicion d’Era Maraton de Donacion de Sang, en Palai d’Espòrts de Vielha, en orari des 11 deth maitin enquias 10 deth ser ininterrumpudament. En passades edicions s’an arribat a obtier entre 200 e 250 bosses de sang.

A diari eth Banc de Sang distribuís uns 1.000 productes sanguinis (plasma fresc, concentrats d’hematies e concentrats de plaquetes) as espitaus de Catalunya, sustot entà casi d’anèmia aguda o cronica, intervencions quirurgiques, tractaments oncologics e accidents grèus. Era sang e es sòns components an ua vida limitada e, per tant, entà assegurar-ne un estòc, cau qu’era donacion se convertisque en un abit.

Era Val d’Aran, gràcies ara collaboracion e solidaritat des sòns poblants, era donacion de sang s’està tornant un costum tà fòrça gent.

A compdar de 2016, se decidic hèr aumens ua des jornades de remassada en format maraton entà hèr mès atractiua aguesta jornada solidària. Ath delà,  s’emplegue tanben eth recinte esportiu deth Palai d’Espòrts de Vielha entà poder acuélher mès actiuetats e mès gent. Tot çò de besonh entà favorir era solidaritat dera gent. D’auti ans i an agut ath long deth dia un pialèr d’actiuetats entara mainadèra, damb ginkanes e diuèrsi talhèrs, atau coma ua chicolatada o eth sorteig d’ua panèra entre toti es donants. Mès, çò de mès important ei era solidaritat qu’es aranesi demòstren damb qui mès a de besonh era sang.

Ei imprescindible mantier es donacions e a poder èster augmentar-les entà arribar a hèr front a toti es besonhs deth dia a dia des espitaus atau coma as possibles situacions d’emergéncia. Pòt donar sang tota persona sana d’entre 18 e 70 ans e que pese mès de 50 kilòs.

Des d’era associacion de Donants de Sang rebremben qu’era donacion non compòrte cap risc entara salut deth donant, que sonque demane ues menuets deth nòste temps, e tot e qu’eth heired NON ei un bon amic dera sang, ja que quan plò e hè mau temps, es donacions quèn lèu enquiara meitat sustot per qu’auem era tendéncia a quedar-mos en casa, cau auer en compde qu’era nòsta docnacion pòt sauvar ua vida, e aguest ei motiu suficient entà hèr un petit esfòrç e anar a dar sang.