Deman dijaus eth pòble de Les celebrarà ua naua edicion dera Quilha deth Haro

Aguest dijaus a compdar des 6 dera tarde, eth pòble de Les vieuerà eth darrèr des actes que cada an commemòren es hèstes deth huec en municipi. Era Quilha deth Haro supause era fin d’un programa que comence en mai damb era Shasclada e entà Sant Joan seguís damb era Crèma deth Haro. Ara, en tot celebrar era hèsta Sant Pere, eth haro que precisament siguec shasclat enguan, se lheuarà en centre dera Plaça deth Haro e la presidirà pendent tot er an, enquiara vigília de Sant Joan der an que ven quan serà cremat.

Ath dessús der arbe s’i dipositen rams de flors que son plaçadi pes parelhes que s’an maridat pendent eth darrèr an en poble, coma simbèu de demana de fertilitat e boni auguris entath futur.

Era Quilha deth Haro coincidís damb era darrèra jornada des hèstes majors de Les, a on es hèstes deth huec supausen er element centrau. Ath delà, er ajuntament de Les se trapa en tot finalizar era creacion dera Associacion des Hèstes deth Huec, qu’amassarà as entitats que trebalhen en aguest airau, e d’autes associacions deth pòble que volguen junhér-se ad aguest projècte. D’aguest biais, se potenciaràn aguestes hèstes en tot premanir mès actiuetats ath long der an. E, tot açò, en tot aufrir mès importància ath sòn nomentament coma Patrimòni Immateriau dera Umanitat.