Dejà s'a aprovat era gestion dera explotacion des depuradores dera Val d'Aran

Eth Plen deth Conselh Generau d’Aran s’amassèc aguest deluns en session extraordinària entà aprobar era gestion dera explotacion des 8 depuradores dera Val d’Aran, en mans d’ua UTE. Aguesta aprobacion siguec per unanimitat e resòlv ua problematica que dejà duraue diuèrsi ans. Aguesta gestion gessèc a concors en 2015 qu’a guanhat ua UTE que s’a constituït coma EDARS Val d’Aran. Diuèrsi recorsi des empreses licitadores an hèt qu’aguesta aprobacion non age estat possible pendent es darrèri 2 ans.

Enquiara, Corsan, era actuau empresa concessionària, qu’ei filiau d’Isolux, a gestionat es depuradores damb prorrògues d’emergéncia. Aguesta madeisha empresa participèc en concors e ei qui mès problèmes a causat ara ora de finalizar aguest procès. Damb era naua UTE, era gestion deth servici ei valorat en 7.200.000€ en tot èster de 8 ans.

Ara se daurís un periòde de 15 dies d’informacion publica. Des deth Conselh Generau pensen que i aurà naues demanes per part de Corsan. Mès en cas que i agen senténcies favorables ara institucion aranesa, sonque mancarà era signatura d’andús partes, e per tant, era gestion començarie en pòques setmanes.