Dejà ei prèst eth Monument de Dijaus Sant de Bossòst

Pendent era tarde de dimars auec lòc ena Glèisa dera Purificacion de Bossòst era esperada collocacion deth Monument de Dijaus Sant o Monument de Setmana Santa.

Se tracte d’un monument de valor excepcionau laguens deth patrimòni catalan que se place en presbiteri dera Glèisa entàs celebracions de Dijaus Sant e Diuendres Sant.

Eth Monument de Setmana Santa ei compausat pera façada, es lateraus e un plafon conformadi per un totau de sèt pèces en forma d’absida e decorats damb teles pintades damb imatges que representen Diu creador e escènes deth Sant Sopar e era Passion, atau coma elements decoratius qu’amplissen er espaci.

Rebrembam qu’era Setmana Santa de Bossòst ei un eveniment fòrça important laguens deth calendari aranés, ja qu’ei er unic pòble de tota era Val d’Aran que la conserve. Per tant, aguesta ei ua celebracion molt demorada tant pes lèu 200 vesins e vesies deth pòble que i participen coma tàs centenats d’assistents que s’i apròpen entà gaudir-la.