Dejà ei actiu er hons bibliografic d'Aran en Depòsit Digitau de Documents dera Universitat Autònoma

Aguesta tarde a agut lòc, ena Bibliotèca Generau de Vielha, er acte de presentacion der "Hons Aran", un catalòg de publicacions (revistes, ena sua majoria) de tematica aranesa. Aguest eveniment a estat presidit per economista, publicista e professor de periodisme ena Universitat Autònoma de Barcelona (UAB), Eugeni Giral (qu'a estat eth principau autor d'aguest catalòg), eth Director Generau d'Archius, Bibliotèques, Musèus e Patrimòni dera Generalitat de Catalonha, Jusèp Boya Busquets e era Còsso de Cultura der Ajuntament de Vielha e Mijaran, Maria Vergés. 

Er "Hons Aran" ei un catalòg que recuelh 90 revistes (ath torn de 1.600 exemplars) de tematica aranesa: des de publicacions escolars o religioses a revistes de botigues o espòrts publicades entre es ans 1921 e 2016. 

Aguest catalòg dejà se pòt consultar en Depòsit Digitau de Documents dera UAB, a on apareishen totes es publicacions damb es exemplars que se n'an podut trapar e informacion sus era lengua ena qu'estan escrites, es ans de publicacion, era periodicitat... Moltes des revistes estan incomplètes pr'amor qu'as autors deth Hons les a estat impossible trapar mès numeròs des madeishes.

Ath delà s'a publicat tanben un libre a on se pòden consultar toti es prumèri exemplars remassadi en aguest Hons, damb detalhs des publicacions e instruccions concrètes de coma trapar es revistes laguens deth Depòsit Digitau dera Universitat.

Er "Hons Aran" encara està en fasa de construccion e entà poder contunhar ampliant aguest recuelh, eth professor Giral a hèt ua crida a toti aqueri que volguen e poguen enviar exemplars, tant des naues publicacions des revistes d'Aran actuaus, coma de numeròs de publicacions antigues que non apareishen en Hons.