Degoteig constant de votants en Vielha pendent es prumères ores des eleccions

Es prumères ores d’aguesta jornada electorau an transcorrut damb normalitat en Vielha. Eth degoteig de votants a estat constant des d’abantes dera dubertura des meses, pr’amor que dejà i auie gent demorant tàs 8 e mieja.  

En cap-lòc aranés son dus es collègis dubèrts, un en Casau deth Jubilat e er aute ena Escòla d’Adults. En aguest darrèr, i a agut un petit malentendut, e ei que, tot e qu’en cens electorau qu’arribèc per corrèu as vesins s’especificaue qu’aguest ère er espaci a on auien de votar, en listes oficiaus coma era der Institut Nacionau d’Estadistica, eth Centre de Formacion d’Adults apareishie damb eth nom d’Escòla publica Garona, e an estat diuèrses es persones que s’an apropat prumèr ath centre d’educacion infantil e primària deth municipi.

Ena rèsta de poblacions municipaus, coma Aubèrt, es prumères ores an auançat tanben damb normalitat. En aguest pòble a estat precisament a on a anat a votar eth candidat numerò 2 de Ciutadans en Lhèida, Javier Rivas, qu’a afirmat auer era esperança d’acabar era jornada damb un elevat nombre de participacion, encara qu’aué sigue un dia laborable entara major part des aranesi.

I a agut ores mès loishes, entre es 10 e es 11, a on era participacion non a estat tan elevada. Mès, de cara ath meddia dejà se podien veir en Vielha coes de votants demorant eth sòn torn, fòrça d’eri aprofitant ua estona liure en trebalh entà exercir eth sòn dret a vòt.