Comence era sason de pesca er 1 d'abriu

Er 1 d'abriu s'inicie ua naua sason de pesca ena Val d'Aran. Un viatge mès, arribada era primauera, ei eth temps de treir es canhes. Eth periòde oficiau de pesca ei entre er 1 d'abriu e eth 31 d'agost, andús inclodidi. Cau tiern en compde:

- Enes lacs de nauta montanha eth periòde de pesca comence eth 28 de mai e finalize eth 30 de seteme.
- Ena bassa d'Aiguamòg eth periòde ei dubèrt der 1 de mai ath 30 de seteme.
- Enes rius de nauta montanha se poderà pescar entre er 1 de mai e eth 31 d'agost.
- Enes trams sense mòrt, eth periòde ei der 1 d'abriu enquiath 30 de seteme.

Cau remercar que sonque se poderà pescar enes trams des rius abilitats e que se pòden consultar enes mapes editats peth Conselh Generau d'Aran. Tanben ei vedat eth tram deth riu Garona en Naut Aran, dempús des desperfèctes ocasionadi enes riuades der an 2013.

En çò que tanh ath numerò de pesces permetudes, cau tier en compde:

- En riu Garona sonque se permet era pesca d'un totau de 4 exemplars per pescaire.
- Enes afluents lateraus e rius de montanha, sonque se permet 5 captures per pescaire.
- Enes lacs e estanhs, se permet enquia 12 exemplars per pescaire ath dia.


IMATGE: CONSELH GENERAU D'ARAN