Centenats de persones ena caminada contra eth càncer de popa en Vielha

Damb era intencion de sensibilizar era societat d’un problèma de salut qu'afècte a milions de hemnes en tot eth mon, centenats de persones an caminat per Vielha entà auçar era sua votz e díder qu'ath càncer de popa se li pòt véncer.

Era caminada, organizada pera Associacion Espanhòla Contra eth Càncer, comencèc ena plaça dera Glèisa, a on ues menutes abantes se hec ua concentracion damb era collaboracion d’ua batucada. Aguesta caminada reivindicatiua trauessèc apuprètz 5 quilomètres peth centre de Vielha.

Tanplan, s'aprofitèc era escadença entà méter ara venta samarretes, paraigües, boligrafs e d’auti materiaus entà requectar hons entara AECC. 

Aguest tipe de tumor ei eth mès frequent enes hemnes occidentaus: ua de cada ueit hemnes aurà càncer de popa ath long dera sua vida, segontes donades dera Associacion Espanhòla Contra eth Càncer. Ei per açò qu’accions com aguesta caminada son tan importantes  entara sensibilizacion dera societat.

En aguest sens, era AECC insistís ena importància deth lèu diagnostic dera malautia a trauès de revisions medicaus. Tanplan, ei bon de saber qu’estudis recents semblen demostrar qu'eth risc de patir càncer de popa se pòt redusir en tot realizar exercici fisic de forma regulara, en tot evitar eth sobrepes e era obesitat e en tot regularizar eth consum d'alcoòl.