Càritas Val d’Aran a organizat un cors de formacion de volontariat entar acompanhament a persones granes

Càritas Val d’Aran a organizat un cors de formacion de volontariat entar acompanhament a persones granes tant en residéncies coma en abitança. Era solitud ei un des grani enemics deth benestar des persones dera tresaua edat, e aguest projècte ac vò combàter.

Es assistents ath cors, qu’a estat de tres sessions de 2 ores, an pogut conéisher un shinhau mès es emocions e sensacions des mès grani.

Laguens deth temari dera formacion, s’a tractat eth ja coneishut coma envielhiment actiu.

Eth messatge d’aguesta iniciatiua non pòt èster mès clar, es persones dera tresaua edat mos an de besonh entà acompanhar-les en aqueres estones en que mès soleti se senten. Er hèt de passar ua estona damb eri pòt repercutir plan positiuaments en sòn benestar emocionau. Per açò, des de Càritas Val d’Aran, hèn ua crida a toti aqueri que volguen dedicar part deth sòn temps ar acompanhament des persones granes.

Diuèrses investigacions confirmen qu'era solitud ei un problèma grèu de infelicitat que suberven ena mortalitat prematura enes persones dera tresaua edat. Per açò un shinhau deth nòste temps, signifique tant entada eri.