Bossòst presentèc ager era prumèra equipacion esportiua deth pòble

Eth pòble de Bossòst compde damb ua naua prepausa fòrça interessant entàs sòns vesins e vesies: era creacion dera prumèra equipacion textila entà realizar espòrt. 

En concrèt, se tracte de tres pèces: ua samarreta, uns pantalons e un justet dessenhats per Paco Padilla. Se tracte d’ua ròba especializada entara practica der espòrt en aire liure de gran qualitat.

Toti es interessadi en aquerir-la se poiràn apropar ar Ajuntament de Bossòst e apuntar-se ath listat a on se comptabilizen es pèces que se demanaràn. Tot e compdar damb eth supòrt economic deth consistòri e dera associacion de comèrç deth pòble, eth prètz d’aguesta equipacion variarà segontes eth nombre de persones que s’i apunten. 

Ei previst qu’es pèces demanades arriben d’aciu a un mes, entà que toti aqueri que les agen aquerit poguen gaudir dera practica der espòrt damb ua ròba çò de mès practica, polida e, sustot, hènt gala deth pòble de Bossòst.