Bossòst contunhe damb es converses entara creacion deth POUM

En darrèr plen der an 2017, er Ajuntament de Bossòst tornèc a méter dessús dera taula era creacion deth nau Plan d’Ordenacion Urbanistica Municipau (POUM), que vierà a substituir es nòrmes subsidiàries qu’enquiara regissen en municipi.

Er Ajuntament cerque arribar ath maxim de consens damb es vesins e vesies deth pòble entà aprovar aguest projècte, e per aquerò toti eri pòden intervier, en tot sométer qüestions e prepausar idèes entara sua redaccion.

Laguens des ahèrs d’urbanisme, un punt a restacar ei eth projècte entath bastiment d’ua naua planta d’elaboracion de bièra artesanau, que poderie ajudar a dinamizar economicaments eth territòri.

Ath delà, eth consistòri anoncièc qu’aprovarà ena sua pròplèu junta de govèrn era prepausa d’ampliacion deth cementèri municipau. Er Ajuntament dejà compde damb era proprietat deth terren e era prepausa d’ampliacion, que contemple eth bastiment de 56 naues places, ei tanben redactada. Aguest projècte balharà responsa a un des besonhs mès urgents en Bossòst.