Bona ocupacion en mes d'agost en Aran

Excellentes donades d’ocupacion ena Val d’Aran pendent aguest pònt deth 15 d’agost que confirmen era tendéncia qu’aguestes son es setmanes mès potentes a nivèu d’afluéncia de visitaires pendent era sason d’ostieu ath long des ans.

Tot e era inestabilitat meteorologica e eth descens des temperatures qu’a ocurrut pendent es darrères jornades, era Val d’Aran a tornat a aufrir as sòns visitaires  un gran numerò d’oportunitats entà poder gaudir d’aguesti dies en familha. En aguest sens, es entorns mès visitadi son, d’abituda, eth cap-lòc deth país, Vielha, e d’auti emplaçaments coma Naut Aran damb es sòns pòbles florits o eth parc de fauna e flòra autoctòna Aranpark.

En cas deth prumèr, Vielha a esdevengut un viatge mès era referéncia en tot auer un gran nombre de persones en tot passejar pes sòns carrèrs sustot ena tarde. Era aucupacion en Pirenèu de Lhèida se place ath torn deth 85%, totun, era Val d’Aran a arribat aguesti dies a superar eth 90-95% en tot èster un viatge mès era referéncia deth Pirenèu.

Era prevision ei que, de cara ad aguestes pròplèu jornades, era situacion sigue relativaments similara enquia darreries deth mes d’agost, moment en qu’era ocupacion començarà a descendir pr’amor dera proximitat der inici escolar. Er ostieu en linhes generau a nivèu toristic en Aran a estat plan bon.