Blanca Fernández Ochoa ja a era sua escultura en Vielha
17/12/2022
Vielha a inaugurat era escultura en aumenatge ara esquiadora Blanca Fernández Ochoa, ath cant der Institut d'Aran
Aguesta tarde, ar acte i an assistit eth baile de Vielha e Mijaran, Juan Antonio Serrano, era sindica d'Aran, Maria Vergés, eth president dera Real Federación Española de Deportes de Invierno, May Peus, e eth director gerent de Baqueira-Beret, Àlex Barés. Atau madeish, i an estat presenti es sòns germans e hilhs.
Era òbra ei dessenhada per escultor basc, Josean Quevedo "Jadiku", formada per tuèus d'acer innoxidable, sus ua plataforma de pèira de quate tones de pes. Tota era pèça hè 3 mètres de nautada. Ena plataforma s'i trapen tanben es betes olimpics.
"Vielha rendís un sentit aumenatge a Blanca Fernández Ochoa, qu'auec ua relacion estrèta damb eth nòste pòble e damb era Val d'Aran des de ben joena. Ath delà, hèc fòrça amics qu'aué volem arregraïr tot çò que hec pera promocion der esquí", comente eth baile de Vielha e Mijaran, Juan Antonio Serrano. E ahig que "aguesta escultura permeterà as naues generacions d'esportistes rebrembar e conéisher eth legat que Blanca mos a deishat".
HÒNT: AJUNTAMENT VIELHA E MIJARAN
HÒNT: AJUNTAMENT VIELHA E MIJARAN
Manu Moga