Baqueira-Beret acuelherà es finaus dera OPA-Alpen Cup d'esquí de hons en 2018

Deth 16 ath 18 de març der an 2018, era estacion d'esquí de Baqueira-Beret serà eth scenari dera celebracion des finaus dera OPA-Alpen Cup d'esquí de hons, ua competicion qu'aparten ath calendari internacionau dera FIS (Federacion Internacionau d'Esquí). Atau ac a decidit eth congrès dera FIS celebrat ena ciutat de Portoroz (Eslovénia) deth 25 ath 28 de mai.

Eth reconeishement deth circuit de hons de Beret impulsat pera actuau Junta Directiva dera RFEDI, presidida per aranés May Peus, comencen a dar es prumèri resultats damb aguesta pròva de maximal nivèu continentau. Eth dia 16 aurà lòc eth Sprint en estil liure d'1,4 e 1,6 kms e eth dia 17 en classic e gessuda en massa es 5, 10 e 15 kms, segontes es categories. Eth 18, aurà lòc era gessuda entàs andicapats en estil liure entà corbir distàncies de 10 a 15 kms, segontes es categories.

Ua grana notícia entara estacion d'esquí e entar espòrt dera Val d'Aran. Era Marxa Beret ei era pròva mès coneishuda, precisaments, d'esquí de hons. Ena darrèra sason, era Marxa Beret hèc part deth calendari deth Circuit de Longues Distàncies Populares dera Federacion Internacionau d'Esquí (ML), e per prumèr viatge tanben hèc part dera Copa Espanha d'esquí de hons deth calendari dera RFEDI. 


IMATGE: FIS