Aran torne a installar un Punt Medic Auançat ath costat der Espitau

Dauant es naui contagis de Covid-19 enregistradi pendent es darrèri dies ena Val d’Aran, eth parçan a installat per dusau viatge en aguest 2020 un Punt Medic Auançat ath costat der Espitau Val d’Aran. 

Aguesta unitat medica, coneishuda coma PMA, s’emplegarà entath triatge de persones damb simptomatologia compatibla damb era COVID-19. Er objectiu, per tant, ei descongestionar es espacis der Espitau.

Enes darrèri tres dies s'an confirmat 5 casi, des quaus quate an relacion entre eri. D'aguestes cinc persones, dues demoren ingressades en Espitau Val d'Aran en situacion establa e es auti tres son en isolament domiciliari.

Des deth Govèrn Aranés arrebremben era importància de complir damb es mesures dictades peth Ministèri de Sanitat entà previer era infeccion dera malautia.