Aran-Thal celèbre es sòns 20 ans

Eth Centre Juvenil e Esplai Aran-Thal a celebrat pendent era dimenjada deth 21 e 22 d’octubre es sòns 20 ans d’istòria en ua grana hèsta dubèrta a totes es persones que pendent es darrèrs dus decènnis an format part d’aguest polit projècte.

Ua ceremònia organizada per equip actuau de direccion e monitors, que comencèc dissabte en maitin damb ua gincana, contunhèc aquera madeisha tarde damb un emotiu aumenatge as sòns 20 ans, un gran sopar e ua net d’hèsta damb fòrça assistents. Aguest aniversari arribèc ara sua fin damb ua missa dimenge ath meddia e un aperitiu conjunt.

Centenats de persones de totes es edats participèren en aniversari d’Aran-Thal, un projècte qu’a perdurat pendent tant de temps gràcies ara tenacitat e er esfòrç dera sua equipa.

Mainatges, monitors, familhes, equip de codina e d’auti collaboradors son eth secrèt der èxit d’aguest esplai, mès tanben era sua directora, ara quau le premaniren mès d’ua sorpresa pendent er aumenatge.

En tot aguest temps, molti des joeni que, de petits, assistiren a Aran-Thal an passat a formar part dera equipa de monitors. Un trebalh totauments voluntari que realizen damb fòrça entosiasme entà contunhar damb aguest polit projècte.

Dempús d’aguesta celebracion tan meritada, les cau començar a programar era naua edicion. Uns dies que quede clar que tant mainatges coma monitors demoren damb fòrça ganes pendent cada ostiu des d’hè 20 ans, e que demoram que contunhe atau pendent fòrça ans mès.