AUE TV
    1. AUE TV

    Aran Salut organize era I Jornada sus Addicions en Joeni dera Val d’Aran

    11/11/2022

    Eth Conselh Generau d’Aran a acuelhut un cicle de conferéncies, impartides per professionaus des airaus sanitari, sociau e educatiu, a on s’an abordat es principaus hònts d’addicion entre es joeni: d’alcòl e drògues, passant pera addicion as jòcs, apòstes o naues tecnologies e s’a destacat era importància qu’a era prevencion e era coordinacion des diferents estaments dera societat entà sajar de reverir es preocupants donades que, dera pandèmia ençà, s’an vist multiplicades

    Era sedença deth Conselh Generau d’Aran a acuelhut era I Jornada sus Addicions en Joeni dera Val d’Aran, ua jornada inaugurada peth conselhèr de Governacion d’Aran, Amador Marqués, era directora deth Servici Aranés de Benèster e Salut, Mª Àngels Borràs, e eth subdirector Generau d’Addiccions, VIH, ITS e Hepatitis Viriques, Joan Colom. Aguest acte a compdat damb era preséncia de diferents professionaus des airaus sanitari, sociau e educatiu autant deth nòste territòri coma de d’auti deth Naut Pirenèu.


    Pendent aguesta jornada, s’an abordat es principaus hònts d’addiccion entre es joeni: d’alcòl e drògues, passant pera addiccion as jòcs, apòstes o naues tecnologies e s’a destacat era importància qu’a era prevencion e era coordinacion des diferents estaments dera societat entà redusir es preocupants donades que, dera pandèmia ençà, s’an vist multiplicades.


    “Entath govèrn deth Conselh Generau d’Aran ei important tractar aguest ahèr e coordinar as diferents airaus dera nòsta societat entà sajar de cercar solucions conjuntes a ua problematica de tant impacte e prebotjar accions de prevencion e conscienciacion entà poder balhar era ajuda que fòrça families deth nòste territòri an de besonh”, afirme era sindica d’Aran, Maria Vergés.


    HÒNT: CONSELH GENERAU D'ARAN 
    Manu Moga
    Tornar