Aran confirme ua desacceleracion en ritme de contagis: aué sonque un positiu mès

Damb un darrèr nau positiu en COVID 19 confirmat aué, era Val d’Aran acumule un totau de 77 contagiadi. Ua donada, totun, que lance un rai d’esperança, pr’amor que pòt èster indicador d’ua tendéncia ara baisha ena transmission dera pandèmia en país.

Eth dimèrcles dera setmana passada, arrebrembam, s’arribèren a confirmar en sonque un dia enquia dotze naui casi. Era desacceleracion en ritme de contagis, atau, ei plan visibla: pendent es 3 darrèri dies sonque s’an confirmat 2 naui contagis.

Per un aute costat, des deth Govèrn d’Aran se vò arregrair eth comportament solidari de toti aqueri aranesi que complissen damb era normatiua der estat d’alarma, en tot demorar en casa e sonque gésser tà çò d’essenciau.

Totun, no toti respècten aguestes normes, e bèri uns meten en perilh era salut des auti: açò passèc ager ena Val d’Aran, quan es Mossos d’Esquadra denoncièren a un òme, malaut de COVID-19, per passejar pera plaça deth sòn poble en Naut Aran e incomplir damb era orde de confinament qu’auie.