Aguesta dimenjada, gaudís deth prumèr Bonspiel de Curling en Vielha

Eth prumèr Bonspiel de Curling Vielha comence aué, diuendres 29 de seteme, en Palai de Gèu.

Aguesta madeisha tarde s'iniciaràn es entrenaments des clubs que i participen e deman, dissabte, auran lòc es tres rondes deth torneg. 

Era competicion començarà deman tàs 09:00 ores en ua prumèra ronda ena quau s'afrontaràn Harrikada Vitrogres còntra Sporting l’Olla ena linha A, Full House e Barcelona Back ena linha 2B, es locaus Curling Val d’Aran còntra Barcelona Red ena linha C e, No Name B52 còntra Hielo Pisuerga ena linha D. 

Es partits contunharàn tàs 12:30 e tàs 17:00 ores, depenent dera avança deth torneg.

Eth madeish dissabte aurà lòc tanben un petit cors d'introduccion ath curling tàs 19:00 ores, damb er objectiu de qu'es aficionats que vagen a veir es partits agen era oportunitat de provar sòrt damb aguest espòrt. 

Era quatau e darrèra ronda classificatòria se jogarà dimenge tàs 08:00 ores e es finaus tàs 11:30. 

S'encara non as podut veir cap des tornegi d'aguest espòrt, que cada còp compde damb mès popularitat en territòri aranés, non ta'c pòs pèrder!