Aguest dissabte 22 de junhsèga, se celèbre era 2au edicion dera Vielha Cycling Tour damb gessuda e arribada en Vielha

Aguesta pròva non competitiua, aurà Vielha coma lòc de gessuda e d’arribada (deuant dera plaça dera glèisa), e trauessarà bona part dera orografia dera Val d’Aran e deth sud de França.

Se demore era participacion de mès de 600 participaires, 200 mès qu’ena edicion de 2022 ena sua estrea oficiau. Enguan, er excicliste professionau, Haimar Zubeldia, tornarà a préner part dera competicion.

Era Vielha Cycling Tour ei un eveniment organizat peth Club Ciclista Vielha, e qu’ei compausat de dues distàncies: Era de Miei Hons, de 90 kms, damb era pujada as pòrts deth Plan Batalhèr, Pòrt deth Portilhon (2 viatges), Guardader d’Arres e arribada en Vielha, e era Gran Hons, de 155 kms, damb es madeishi pòrts, e damb er ahijut deth Pòrt de Balès.

“Èm fòrça satisfeti de qu’era Vielha Cycling Tour torne a celebrar-se enguan, en tot assolidar a Vielha e Mijaran coma epicentre esportiu sostenible en Pirenèu”, comente eth baile de Vielha e Mijaran, Juan Antonio Serrano. E ahig que “a despièt de non èster ua pròva competitiua, fòrça gent i prenerà part e açò beneficiarà ath sector toristic deth municipi pendent aguesta pròplèu dimenjada”.

D’aute biais, eth còsso d’espòrts, David Moreno, afirme que “ei ua grana notícia er aument de participaires en relacion ara edicion de 2022, e que demoram que pogue assolidar-se en calendari d’ostiu de pròves esportiues deth nòste municipi pendent es pròplèu ans”.


HÒNT: AJUNTAMENT VIELHA E MIJARAN